Tono Marohitanga ki Te Tahua Whakakaha a Te Pūnaha Hihiko: Vision Mātauranga 2025

Mō tēnei arawātea

Ka tuku pūtea mātou ki ngā kaupapa a te Tahua Whakakaha a Te Pūnaha Hihiko: Vision Mātauranga mā roto i ētahi kaupapa haumitanga e rua - te Kaupapa Tūhono me te Kaupapa Ika Tauhou.

Ko ngā whāinga o te Tahua ko te:

• whakapakari i te mātau, te raukaha, ngā pūkenga me ngā whatunga i waenga i te Māori me te pūtaiao, te auaha me te pūnaha hangarau, ā, me te
• whakapiki i te mārama ki te whai wāhi o te rangahau pūtaiao* ki ngā wawata o ngā rōpū Māori, otirā me te whai hua o Aotearoa whānui.

^*Whakamahia ai e MBIE  te whakamārama a Te Kaunihera Pūtaiao o te pūtaiao me tōna tikanga rangahau

Mā tēnei Tono Marohitanga e whakarato i ngā mōhiohio me pēhea te tuku tono ki te Tahua, ka pēhea te aromatawai i tō tono, ka ahatia tō tono ina whiwhi koe, ā, me pēhea hoki te whakapā mai ki a mātou kia āwhinahia koe me te tukanga tono. Tēnā pānuitia Mahere Haumi a Te Pūnaha Hihiko: Vision Mātauranga 2025  me ngā  whārangi ipurangi a Te Pūnaha Hihiko: Vision Mātauranga  mō ngā kōrero e pā ana ki ngā whāinga haumi me ngā whakamārama o te Kaupapa Tūhono me te Kaupapa Ika Tauhou.

He aha ngā pūtea e wātea ana?

He āhua $2.0 miriona (hāunga te GST) e wātea ana ki te tautoko i ngā marohitanga angitu hou i te huringa haumi o Te Tahua Whakakaha a Te Pūnaha Hihiko: Vision Mātauranga 2025.

Ko te tapeke o te pūtea e wātea ana he $4.0 Miriona (hāunga te GST) i ia tau, otirā ko te toenga o te āhua $2.0 miriona (hāunga te GST) i ia tau ka tohaina ki ngā kirimana o te wā nei nō ngā huringa haumi o mua a te Tahua.

Ka eke ki te rua tau te roa o ngā hōtaka mahi mō te Kaupapa Tūhono me te Kaupapa Ika Tauhou. Mō ia kaupapa me te hōtaka mahi:

• atu ki te kotahi tau te roa, ko te pūtea mōrahi mō ia marohitanga angitu he $150,000 (hāunga te GST)
• kei waenga i te kotahi me te rua tau, ko te pūtea mōrahi mō ia marohitanga angitu he $250,000 (hāunga te GST). Ehara i te herenga ki te tono i ngā pūtea katoa e wātea ana, mō te roanga rānei o te rua tau o te roa o ngā kaupapa.

Me hāngai pū ngā utu o te kaupapa ki te hōtaka mahi o taua kaupapa. Ka taea te whakamahi i ngā pūtea hei utu i ngā utu whanaektanga mahi hōtaka, te kawenga me ngā utu whakahaere (tae atu ki ngā hāereere). Kāore e utua ngā whakapaunga pūrawa.

Ko wai e āhei ana ki te tono pūtea?

E whai whakaarotia ai tētahi marohitanga kia aromatawaitia mō te Kaupapa Tūhono, Kaupapa Ika Tauhou rānei, me tutuki ngā paearu māraurau i raro nei. Ko ngā marohitanga kāore mātou i te whakaaro ake i ū ki ēnei paearu, ka whakakorea te tono pūtea i runga i ngā take māraurau.

E māraurau ai koe ki ngā pūtea, ko tā ngā marohitanga:

1. Me whakahaere Māori me whakahaere rangahau, me kairangahau takitahi rānei te kaitono, ā, me hinonga ā-ture takitahi o Aotearoa hoki te whakahaere.
   
   Ko te Whakahaere Māori he whakahaere e tautuhi ana i a ia anō hei Māori, ā, ka whakamahi (ka hiahia rānei ki te whakamahi) i te pūtāiao, te auaha me te hangarau, aua tūmomo mahi rānei.
   
   Ko te Whakahaere rangahau  e tautuhia ana hei whakahaere e whai ana i te mātau rāroto ki te kawe i ngā mahi pūtaiao, auaha me te hangarau, aua tūmomo mahi rānei. Kāore ngā tari Kāwanatanga (e tautuhia ana i raro i te Āpitihanga 2 o te Public Service Act 2020) e whakaarotia ana hei whakahaere Rangahau, nā reira, e kore rātou e māraurau ki te tono pūtea.
   
   Ko te kairangahau takitahi e tautuhia ana hei tangata e mahi takitahi ana, kāore i te mahi mā tētahi whakahaere Rangahau, me te mātau anō ki te kawe i ngā mahi pūtaiao, auaha me te hangarau, aua tūmomo mahi rānei.
   
   
2. Me whakauru he whakahaere Rangahau, he kairangahau takitahi rānei, ā, me tētahi whakahaere Māori, otirā ko tētahi me tū hei kaiārahi, arā, hei whakahaere tuku Kirimana, ā, ko tētahi atu hei Hoa Rangapū.
   
   Ko te hononga, kaua noa i waenga i te kaitono me te whakahaere e noho nei hei hinonga matua, turuki, turuki-tūhono rānei o tētahi atu whakahaere; i waenga rānei i ngā tari o tētahi whakahaere kotahi (hei tauira, he kura wānanga).
   
   
3. Kāore mō ngā mahi kua oti kē i tētahi atu tari kāwanatanga te tuku pūtea.
   
   
4. Kāore he ākonga kura wānanga ukiuki, he ākonga kura tuarua rānei i roto.
   
   Mēnā e māraurau ana ngā ngohe kei roto i ngā hōtaka mahi ki ngā pūtea a Te Tāhuhu o te Mātauranga, kāore e whaitake ana kia uru ki ngā marohitanga tono pūtea ki Te Tahua Whakakaha a Te Pūnaha Hihiko: Vision Mātauranga.
   
   
5. Me whakahaere te nuinga o ngā mahi ki Aotearoa nei, māna, kua whai whakaaro a MBIE tērā ētahi take nui o te whai whakaaro ki te marohitanga.
   
   Ki te kore te nuinga o ngā mahi o te hōtaka mahi e kawea ki Aotearoa, tēnā whakamāramahia ki tō marohitanga ngā take i pēnei ai, ā, he aha te hira o tērā. Mēnā he pakari ngā hononga o te hōtaka mahi ki ngā ringa rehe mātauranga taketake i ētahi atu whenua, me whakaatu i te hua o tēnei ki a Aotearoa.
   
   
6. Me kaua tētahi hinonga kāwanatanga o Rūhia (tae atu ki te tautoko i te ope tauā o Rūhia, ngā mahi haumaru rānei) e whai hua, tae atu ki tētahi rōpū i waho o te kāwanatanga rānei e tirohia ana tērā pea kei te whai wāhi ki te riri.
   
   
7. Me tuku ki te Pītau - te Pūnaha Whakahaere Haumi a MIE, ā, me tutuki hoki ngā herenga o te wā, te hōputu, ngā ihirangi, me ētahi atu herenga ā-whakahaere.
   
   Te Kaupapa Ika Tauhou, Tūhono rānei
   
   
8. Mō ngā mahi ka uru ki tētahi o ēnei kaupapa e rua, otirā pērā ki ngā herenga o ngā kaupapa e rua e noho ana ki te Mahere Haumi a Te Tahua Whakakaha a Te Pūnaha Hihiko: Vision Mātauranga. Mō te Kaupapa Ika Tauhou, me whakaingoa te marohitanga i te hunga ka uru ki ngā tūranga ika tauhou.
   
   Ngā tāhuhu kaupapa a Vision Māturanga
   
   
9. Me whakatau tētahi, ētahi rānei o ngā kaupapa a Vision Mātauranga, kaua noa iho ko te hauora.
   
   Kua hoahoatia ngā haumi e ārahina ana e MBIE i roto i te Mahere Haumi me ngā haumi a Te Kaunihera Rangahau Hauora (HRC) kia tapatahi te noho. Hei kaore i te tāruaruatanga o ngā haumitanga a te HRC, kāore a MBIE e tuku pūtea ki ngā hōtaka e hāngai pū ana ki te hauora anake. Ka whai whakaarotia ngā marohitanga i te wā he wāhanga ngā hua hauora o tētahi huinga putanga whānui.

Reta whanake-ngātahi

Ki te tuku tono koe, me tukuake he reta whanake-ngātahi. Me whakahua tēnei reta he mea waihanga-ngātahi te hōtaka mahi e ngā rōpū e rua, ā, he mea waitohu e te whakahaere tuku Kirimana me te (ngā) whakahaere Rangapū.

Te tukanga tuku tono me te aromatawaitanga

Ka whakatakoto tēnei wāhanga i:

• ngā rā matua
• ngā tuhinga tohutoro me ngā ihirangi matua
• te tukanga tuku tono
• te tukanga aromatawai me te whakataunga
• ngā herenga tuku kirimana me te tuku pūrongo

Ngā rā matua

Tērā pea ka whakarerekētia ngā rā. Ka whakamōhiotia koe mā te īmēra ki te whakarerekētia. E tāpiritia ai koe ki tēnei rārangi whakamōhio ā-īmēra, tēnā ohauru(external link) ki te whiwhi kōrero hou.

Ngā tuhinga me ngā ihirangi matua

I te wā e whakawhanake ana koe i tō tono, e whakahau ana mātou i a koe ki te tirotiro i ēnei tuhinga tohutoro matua:

• Tirohia Te Mahere Haumi a Te Pūnaha Hihiko: Vision Mātauranga 2025 mō ngā whāinga me ngā putanga o te tahua haumi
• Ngā whārangi ipurangi a Te Pūnaha Hihiko: Vision Mātauranga
• E whakatakoto ana te Kaupapahere o Vision Mātauranga [PDF, 418 KB]  i te anga kaupapahere a te Kāwanatanga e whai ana ki te unu i te pitomata pūtaiao me te auaha o te mātauranga Māori, ngā rauemi me ngā tāngata, hei āwhina i te iwi o Aotearoa ki te hanga i tētahi anamata pai ake.
• Te Pūnaha Hihiko: Vision Mātauranga 2025 Tātauira Marohitanga [DOCX, 211 KB]
• Aratohu aromatawai me te tuku piro a Te Tahua Whakakaha a Te Pūnaha Hihiko: Vision Mātauranga 2025
• Te Tātauira Kirimana Whakaaetanga a Te Tahua Whakakaha a Vision Mātauranga 2025 [DOCX, 158 KB]
• Te Pūnaha Hihiko: Vision Mātauranga Te Tātauira Kirimana Whakaaetanga a Te Tahua Whakakaha a Vision Mātauranga 2025 [DOCX, 202 KB]
• Tono Marohitanga ki Te Tahua Whakakaha a Vision Mātauranga me te Aratohu Tuku Piro mō te Huringa Haumi 2025 PDF [PDF, 514 KB]

Tukanga tono

Me whakakī ngā kaitono i ā rātou marohitanga ki Pītau, tā mātou Pūnaha Whakahaere Haumitanga, he tomokanga tuihono haumaru. Hei āwhina i a koe ki te whakarite i tō marohitanga kua whakaratoa e mātou tētahi tātauira marohitanga.

1. Ka tāurua, ka tukua hoki ngā marohitanga ki Pītau Mēnā kāore ō takiuru, whakapā atu ki tō Tari Rangahau ki te tiki i tētahi, mēnā kāore ō Tari Rangahau, ka taea te tono āheinga. I mua i te whakawhanake i tō marohitanga, ka whakahautia koe ki te whai whakaaro ki ngā paearu māraurau, ngā paearu aromatawai, me ngā ture me ngā here e pā ana ki tēnei Tono Marohitanga.
2. Kei te tātauira marohitanga ngā tohutohu mō te āhua o te whakarite i tō marohitanga me ngā mōhiohio e hiahiatia ana. E tūtohu ana mātou kia whakamahi koe i te tātauira marohitanga i whakaratoa hei tuhi i ngā mōhiohio e hiahiatia ana mā te taupānga tukatuka kupu e hiahiatia ana, ā, ka rite ana ki te tuku, tāruatia ka whakapiri i ngā wāhanga e tika ana ki ngā āpure Pītau tika me te tukuatu i ō tuhinga tautoko ina tohua.
3. Ka taea e ngā kaimahi a MBIE te āwhina i a koe ki te whakauru ki Pītau me te tuku ārahitanga me pēhea te tāuru kiko.
4. Ka whakamahia ngā mōhiohio kei tō marohitanga mō te aromatawai, otirā ka noho hei pūtake o te kirimana mō ngā kaupapa ka waimaria.
5. E pōhiritia ana ngā marohitanga reo Māori. Tērā pea ka whakahaeretia ki te reo Ingarihi te aromatawaitanga o ngā marohitanga. Ka kōwhiri pea ngā kaitono ki te tāpiri whakapākehātanga o tā rātou marohitanga, ka waiho rānei ki ngā kaiwhakawhiti reo ka tīkina e MBIE, otirā kāore he utu ki te Kaitono. Kāore he whakaaweawetanga o te kōwhiringa reo ki ngā putanga aromatawai. Me tuku ngā whakapākehātanga ki Pītau, ā, me ū ngā whakawhitinga reo ki te wairua o te putanga reo Māori.

Te tukanga aromatawai

Ka whai wāhi tēnei tukanga aromatawai

1. Ka tuku marohitanga whiwhi tahua ngā kaitono.
2. Ka hihiratia e MBIE ngā marohitanga katoa, atu ki ngā paearu māraurau.
3. He whakaae/whakahē i ngā marohitanga kua tuaritia ki a ia, me te puaki i ngā pānga taharua mēnā rā he pānga. Ko tā ngā kaiaromatawai he whakaae/whakahē rānei ki ngā marohitanga e māraurau ana, me te whakapuaki i ngā pānga taharua.
4. Ko ngā marohitanga māraurau katoa ka aromatawaitia e ngā mema motuhake o te pae aromatawai, atu ki ngā paearu aromatawai, ā, ka whakairia ki Pītau.
5. Ka hui te Pae Aromatawai ki te whiriwhiri i ngā marohitanga me te eke ki tētahi tatūnga ki ngā piro, ngā whakahoki kōrero me ngā tūtohu, hei whakauru ki te pūrongo a te Upoko o te Pae.
6. Ka whakarato pūrongo te Upoko o te Pae, kei roto ngā tūtohu tuku pūtea, ki te Hēkeretari Tuarua o te Mahi, te Pūtaiao me te Hinonga.

Mēnā e tuku marohitanga ana koe, tirohia te rārangi o ngā mema Pae Aromatawai i raro (ka whakaputaina ngā ingoa hei te 29 o Hepetema 2024), kei kitea pea he pānga taharua.  Ina kitea e koe tētahi pānga taharua ōkiko, tūpono, hāngai, tāhapa rānei, me whakamōhio mai i a mātou i mua i te rā kati o ngā tono mā te īmēra ki vmcf@mbie.govt.nz me ngā taipitopito hei wānangatanga.

E rua ngā tūmomo taumata o ngā pānga taharua:

He pānga taharua hāngai, otrā ko tā te Kaiaromatawai:

• e hāngai ana tana whai wāhi ki tētahi marohitanga (hei kaiwhakauru, kaiwhakahaere, whakaruruhau, hoa rangapū rānei, he hononga whaiaro tūtata rānei ki te kaitono, hei tauira, nō te tūranga whānau kotahi
• he hoa mahi tahi, e whai wāhi ana rānei ki te marohitanga a te kaitono.

He pānga taharua tāhapa, otrā ko tā te Kaiaromatawai:

• e whai tūranga mahi ana i tētahi wāhi mahi e whai wāhi ana ki tētahi marohitanga, engari kāore i whai wāhi ki te marohitanga ake a te kaitono
• he hononga whaiaro, ngaio hoki/rānei ki tētahi o ngā kaitono, hei tauira, he hoa
• e aromatawai ana i tētahi marohitanga e whakawātia ana, otirā tērā pea e tautute ana ki ā rātou mahi pakihi.

He whāiti rawa te whai whakaarotanga o te hononga whaiaro tūtata,  hei tauira, te hononga hāngai (whaiāipo, tūranga whānau kotahi, tautetanga). Kāore te hononga ā-iwi, ā-hapū rānei e whakaarotia ai hei pānga taharua.

Ngā mema o te Pae Aromatawai

Ka whakaputaina he rārangi o ngā mema o te Pae Aromatawai ki konei i mua i te 29 o Hepetema 2023.

Ngā paearu aromatawai

Ka aromatawai te Pae Aromatawai i ngā marohitanga o te Kaupapa Tūhono me te Kaupapa Ika Tauhou, atu ki ia paearu i raro, ā, ka tuku piro mai i te 1 (kounga iti) ki te 7 (kounga nui).

He 25% te taumaha o ia paearu.

Kairangi

Mā te haumi ki te Kairangitanga e āwhina i te pūnaha pūtaiao, auaha me te hangarau ki te whakawhanake, te pupuri me te poapoa i ngā tāngata pūkenga nui, te whakawhanake i te tangata me ngā rōpū, kia whai hua ai rātou i ngā mātauranga hou, te whakapiki i ngā pūkenga whai pānga ki te kawenga o ngā rangahau a Vision Mātauranga. 

Whanaketanga Tangata, ngā Hononga me ngā Pūkenga (25%)

Pātai Matua: He aha te whānuitanga o te aranga ake, me te toitūtanga pea o ngā pūkenga, te mātau, ngā whatunga, ngā hononga me ngā arawātea rangahau tauroa i te kaupapa?

Te Raukaha o ngā Kawenga Mahi

Pātai Matua: He aha te nui o te tūpono whakatutukitanga o ngā putanga e marohitia ana e tō kaupapa?

Te Pānga

E rapu pānga ana te Tahua mā roto i ngā hōtaka mahi e tūhura ana i ngā huarahi e whai hua ai te tangata, te whānau, ngā hapori Māori me ngā whakahaere Māori i te rangahau, te whanaketanga me te whakatinanatanga o te mahi pūtaiao.

Ngā Putanga o Vision Mātauranga (25%)

Pātai Matua: He aha te whānuitanga o te tautoko a te kaupapa i te kaupapahere o Vision Mātauranga me te tautoko i te huakitanga o te pitomata pūtaiao, te auaha me te hangarau o te mātauranga Māori, ngā rauemi me ngā tāngata, e whai hua ai a Aotearoa?

Ngā hua ki te Pūtaiao, te Auahatanga me te Hangarau (25%)

Pātai Matua: Whakamāramatia te āhua o ngā hua o te pikinga mātau, raukaha, pūkenga me ngā whatunga ki te  pūnaha pūtaiao, auaha me te hangarau, ā, me ngā pānga e matapaetia ana i te kaupapa, i te mutunga o te kirimana.

Mō ētahi atu kōrero o te aromatawai me te tuku piro a ngā kaiaromatawai ki ngā marohitanga, tirohia ngā whārangi o te aratohu Aromatawai me te tuku piro

Aratohu aromatawai me te tuku piro a Te Tahua Whakakaha a Te Pūnaha Hihiko: Vision Mātauranga 2025

Ngā whakahoki kōrero ki te kaitono

I muri i ngā hihira māraurau, ka whakamōhiotia ngā kaitono mēnā e māraurau ana rātou, kāore rānei. Ki te kore ngā kaitono e māraurau, ka whakamōhiotia koe ki ngā take i pēnā ai.

I te otinga o te tukanga aromatawai whānui, ka whiwhi ngā kaitono katoa i tētahi whakamōhiotanga ā-tuhi me ngā whakahoki kōrero e pā ana ki ngā tono. Ka poua ngā whakahoki kōrero ki ngā mōhiohio i kohia i ngā mema pae aromatawai mō ngā āhuatanga pakari, ngoikore hoki o ā rātou marohitanga. 

Ngā whakatau tuku pūtea

Kei te Hēkeretari Tuarua a MBIE mō te Mahi, Pūtaiao me te Pakihi te whakatau haumi whakamutunga, i poua ki ngā tūtohu a te pūrongo a te Upoko o te Pae, ā, tērā pea:

• ka whakatau i ngā herenga tōmua o te kirimana, hei whakatutuki i mua o te tuku kirimana ki taua kaupapa
• ka whakatau i ētahi herenga motuhake hei āpitihanga ki ngā ture me ngā herenga ahuwhānui e takoto ana ki te Kirimana Tuku Pūtea a te Tahua
• ka whakarerekē pea i te ingoa o te kirimana (me whakaae hoki te kaitono)
• ka whakarerekē i te roa o te kaupapa
• ka whakarerekē i te tohanga pūtea i tērā i marohitia
• ka hiahia kia whiriwhiria te mahere a te marohitanga kia tau ai ngā hiahia o MBIE, hei whakaata i te huringa ki te pūtea.
• ka whai whakaarotia te pai o ngā mahi o mua i ērā atu o ngā Kirimana Tuku Pūtea a VMCF. I te wā e tūtohua ana kia whiwhi pūtea te kaitono, engari he herenga tuku pūrongo tonu tāna, he takohanga ā-kirimana VMCF rānei kāore anō i tutuki i te wā o te tuku kirimana, ka puritia pea e mātou te kirimana tuku pūtea kia tutuki rānō ngā takohanga kirimana VMCF o mua. Kia mōhio ake, ka whakatōmuritia te rā tīmata o te kirimana hou mēnā e tāwēwē tonu ana ētahi takohanga kirimana VMCF o mua.

Ka whakamōhio mātou i te Kaiwhakahaere Tuku Tono o te marohitanga ki ngā whakataunga tuku pūtea ā te Māehe 2025. Ka whakaputaina ngā ingoa o ngā kaitono angitu ki ā mātou whārangi ipurangi a Te Tahua Whakakaha a Te Pūnaha Hihiko: Vision Mātauranga me te whakaputa anō ki tētahi pānuitanga pāpāho, ka pānuitia rānei e te Minita o Te Pūtaiao, Auaha me te Hangarau, me te Minita Whanaketanga Māori.

Te tukanga tuku kirimana

Ka kuhu ngā kaitono angitu ki tētahi Kirimana Tuku Pūtea ki a mātou (i runga anō i te tutukitanga o ngā herenga tōmua).

Me waitohu, ka whakahoki i te whakaaetanga tuku pūtea ki a mātou i roto i te kotahi marama o te whiwhinga.

Ko ngā ture me ngā herenga o te Kirimana Tuku Pūtea a Te Tahua Whakakaha a Te Pūnaha Hihiko: Vision Mātauranga, ka whai pānga ki te whakaratonga pūtea i whakaaetia e mātou ko te whakahaere whiwhi kirimana. Mā te tuku marohitanga, e whakaae ana koe ki ngā ture me ngā herenga o te Kirimana Tuku Pūtea  a Te Tahua Whakakaha a Te Pūnaha Hihiko: Vision Mātauranga. E wātea ana tētahi Kirimana Tuku Pūtea tauira i te wāhanga o Ngā tuhinga me ngā ihirangi matua kei runga.

Ngā utunga

Mā te kaipupuri kirimana e whakahaere i ngā pūtea, kia mātua whakaritea te kawenga o ngā hōtaka mahi i kirimanatia, me te ū hoki ki ngā herenga tuku pūrongo. Ka pēnei te whakarato pūtea a MBIE, i runga anō i ētahi herenga kirimana whāiti:

• 50% i te tīmatanga o te hōtaka mahi
• 40% i te wā wawaenga (i muri i te tuku pūrongo kokenga e pai ai ki a mātou), ā, me te
• 10% i te tutukitanga o te hōtaka mahi (i muri i te tuku i te pūrongo whakamutunga e pai ai ki a mātou). Kei tēnei tūtohu he tirohanga whānui o ngā herenga tuku pūrongo mō ngā kirimana.

Te tuku pūrongo me te aroturuki

Kei tēnei tūtohu he tirohanga whānui o ngā herenga tuku pūrongo mō ngā kirimana.

Me whakarite ngātahi ēnei pūrongo, otirā me uru ngā mōhiohio a te kaipupuri kirimana me ngā Whakahaere rangapū, tae atu ki tētahi reta whanake-ngātahi mai i te Whakahaere rangapū e whakahaere rangapū e whakaū ana i te mahinga ngātahi o ngā whakahaere, otirā me te whakaū i te tika o ngā mōhiohio.

Me uru ki te pūrongo kokenga ngā mōhiohio o te tūnga me te kokenga ki te kawenga o te hōtaka mahi ki tērā i kirimanatia.

Me uru hoki ēnei mōhiohio ki te pūrongo whakamutunga:

• te tūnga me te kokenga ki te kawenga o ngā Hua me ngā Tūmahi i kirimanahia.
• ngā tāpaetanga pūtea-tūhono (mēnā ka whai pānga)
• ngā whakaritenga whakaruruhau i te tangata (mō te Kaupapa Ika Tauhou)
• ngā whakatutukinga matua
• ngā mōrearea e maiea ana, ā, me ngā mahi ki te whakatau i ēnei
• tauākī tūmatanui
• he aromatawai ake mēnā ka puta he arawātea anō mō Vision Mātauranga i tēnei hōtaka mahi, mēnā ka angitu te kaupapa ki te whakapiki i ngā pūkenga me ngā whatunga, me te whaihua o te hōtaka mahi whānui.

Ka tukuna ngā pūrongo ki a Pītau, ā, ka arotakea e mātou.

Whakapā mai

Ngā pātai tuku tono. Īmēra:

vmcf@mbie.govt.nz

Ngā pātai mō Pītau:

imssupport@mbie.govt.nz

Waea:

0800 693 778 (Mane ki te Paraire, 8:30am ki te 4:30pm)

Ka taea hoki te ohauru ki tā mātou pānui matihiko Matohi

Ohauru(external link)